LIGJI Nr. 10138, dt 11.5.2009 “PËR SHËNDETIN PUBLIK”

Neni 7

Shërbimet bazë të shëndetit publik

1. Shërbimet bazë të shëndetit publik janë:

a) promovimi i shëndetit;

b) edukimi shëndetësor;

c) parandalimi i sëmundjeve, përfshirë imunizimin, depistimin;

ç) siguria ushqimore;

d) shëndeti në punë;

dh) shëndeti mjedisor, përfshirë monitorimin e mbetjeve urbane;

e) shëndeti riprodhues, përfshirë shëndetin e nënës, të fëmijës dhe shëndetin seksual;

ë) parandalimi dhe kontrolli i përdorimit abuziv të substancave (produktet e duhanit, alkool, lëndë narkotike dhe psikotrope etj.);

f) shëndeti mendor;

g) sistemi i informacionit në shëndetin publik;

gj) mbikëqyrja epidemiologjike në shëndetin publik;

h) laboratorët e shëndetit publik;

i) monitorimi i shërbimeve të shëndetit publik në kujdesin shëndetësor parësor;

j) kërkimi shkencor në shëndetin publik;

k) trajnimet në shëndetin publik.

2. Shteti, nëpërmjet institucioneve kompetente, merr masa për garantimin e shërbimeve bazë të shëndetit publik.

Neni 52

Mbrojtja e shëndetit nga përdorimi i alkoolit

1. Mbrojtja e shëndetit nga përdorimi i alkoolit përfshin tërësinë e masave që ndërmerren për:

a) ndalimin e konsumit të alkoolit tek të miturit;

b) ndërgjegjësimin e publikut për dëmet e abuzimit me alkoolin dhe garantimin e një informimi efektiv dhe të vazhdueshëm të përdoruesve të alkoolit për këto dëme;

c) reduktimin e dëmit te përdoruesit e alkoolit;

ç) kontrollin e reklamimit të pijeve alkoolike.

Mënyra dhe organizimi i mbrojtjes së shëndetit publik nga përdorimi i alkoolit rregullohen me ligj të veçantë.

Neni 54

Organizimi

1. Organizimi, funksionimi dhe mbikëqyrja e të gjitha veprimtarive, që zhvillohen në fushën e shëndetit riprodhues, në institucionet shëndetësore, mbrojtja e të drejtave riprodhuese të individit e të çiftit rregullohen me ligj të veçantë.

2. Të gjithë fëmijët dhe gratë gjatë shtatzënisë, lindjes dhe paslindjes kanë të drejtën e përfitimit të kujdesit shëndetësor, pavarësisht nga aftësia e tyre për të paguar.

3. Ministri i Shëndetësisë miraton me urdhër kujdesin shëndetësor, që u ofrohet kategorive të përmendura në pikën 2 të këtij neni.

Lexo të plotë ligjin