MARRËVESHJA NDËRMJET REPUBLIKËS SË SHQIPËRISË DHE MBRETËRISË SË SPANJËS PËR BASHKËPUNIMIN NË LUFTËN KUNDËR KRIMIT

Neni 1

1. Palët, sipas legjislacionit të tyre kombëtar dhe sipas kësaj Marrëveshjeje mbi bashkëpunimin, do të bashkëpunojnë në luftën kundër krimit, veçanërisht për format e organizuara të tij.

2. Palët do të bashkëpunojnë në luftën kundër formave të aktiviteteve kriminale, veçanërisht kundër:

a) terrorizmit;

b) krimeve kundër jetës dhe integritetit të personave;

c) trafikut të paligjshëm, prodhimit dhe tregtimit të drogave dhe substancave psikotrope, si edhe lëndëve të para dhe perkursorëve për prodhimin e tyre;

d) imigrimit të paligjshëm dhe trafikut të qenieve njerëzore dhe shkeljes së regjimit të pasaportave dhe vizave;

e) ndalimit të paligjshëm të personave dhe rrëmbimit të fëmijëve;

f) falsifikimit (prodhim, tjetërsim), përdorimit të paligjshëm të dokumenteve të identitetit (pasaportave, vizave dhe dokumenteve lidhur me mjetet motorike) dhe shpërndarjes mashtruese të monedhës, mjeteve të pagesës, çeqeve dhe letrave me vlerë;

g) kontrabandës;

h) pastrimit të parave;

i) falsifikimit (prodhim, tjetërsim) dhe shpërndarjes mashtruese të monedhës, mjeteve të pagesës, çeqeve dhe letrave me vlerë;

j) vjedhjes së mjeteve motorike dhe tregtisë së paligjshme me to dhe aktiviteteve kriminale të lidhura me to;

k) trafikut të paligjshëm të armëve, municionit, lëndëve plasëse, lëndëve të para strategjike, (materialeve bërthamore dhe radioaktive), si edhe substancave të tjetra përgjithësisht të rrezikshme, dhe mallrave dhe teknologjive me përdorim të dyfishtë;

l) trafikut të paligjshëm të objekteve kulturore me vlerë historike dhe veprave të artit;

m) akteve kriminale kundër financave publike, përfshirë evazionin fiskal;

n) formave të organizuara të krimit kundër lirisë seksuale, veçanërisht atyre që lidhen me minorenët, si edhe shtypjen, përhapjen dhe dhënien e materialeve pornografike me pjesëmarrjen e minorenëve;

o) akteve kriminale me futjen në sistemet kompjuterike;

p) veprave penale kundër burimeve natyrore dhe ambientit.

3. Palët do të bashkëpunojnë gjithashtu në luftën kundër llojeve të tjera të krimeve, parandalimi, zbulimi dhe hetimi i të cilave kërkojnë bashkëpunimin e autoriteteve kompetente të të dy shteteve. Palët do të bashkëpunojnë edhe në zbatimin e ndërsjellë të masave të posaçme të mbrojtjes, përfshirë ndryshimin e vendbanimit dhe qëndrimit të personave të mbrojtur në territoret përkatëse të palëve, si edhe në shkëmbimin e përvojave të ekspertëve në fushën e mbrojtjes së dëshmitarëve.