MARRËVESHJE NDËRMJET REPUBLIKËS SË SHQIPËRISË DHE ISLANDËS, PËR RIPRANIMIN E PERSONAVE ME QËNDRIM TË PAAUTORIZUAR

Neni 2

Ripranimi i shtetasve të vet

1. Republika e Shqipërisë do të ripranojë, me kërkesën e Islandës dhe pa formalitete të tjera, përveç atyre të parashikuara në këtë Marrëveshje, të gjithë personat të cilët nuk plotësojnë, ose nuk plotësojnë më tej, kushtet në fuqi për hyrjen, qëndrimin ose banimin në territorin e Islandës, me kusht që të provohet, ose të pranohet në mënyrë të vlefshme në bazë të sigurimit të provave të qarta, se ata janë shtetas të Republikës së Shqipërisë.

2. Republika e Shqipërisë gjithashtu do të ripranojë:

– fëmijë të mitur e të pamartuar të personave të përmendur në paragrafin 1, pavarësisht vendlindjes ose kombësisë, nëse nuk kanë lejeqëndrimi të pavarur në Islandë;

– bashkëshortët, mbajtës të një kombësie tjetër, të personave të përmendur në paragrafin 1, pasi pajisen me lejen për të hyrë e për të qëndruar, ose marrin lejen për të hyrë e për të qëndruar në territorin e Republikës së Shqipërisë, nëse nuk kanë lejeqëndrimi të pavarur në Islandë:

3. Republika e Shqipërisë do të ripranojë persona të cilëve u është hequr ose kanë hequr dorë nga nënshtetësia e Republikës së Shqipërisë që kur kanë hyrë në territorin e Islandës, nëse këtyre personave nuk u është premtuar të paktën natyralizimi nga Islanda.

4. Republika e Shqipërisë, sipas nevojës dhe pa vonesë, do të pajisë personin për ripranimin e të cilit është rënë dakord, me dokumente udhëtimi që kërkohen për kthimin e tij/saj të vlefshme për një periudhë 20-ditore. Nëse, për arsye ligjore ose faktike, personi në fjalë nuk mund të transferohet brenda periudhës së vlefshmërisë së dokumentit të udhëtimit të lëshuar fillimisht, Republika e Shqipërisë, pa vonesë, do të shtyjë vlefshmërinë e dokumentit të udhëtimit ose, nëse është nevoja, do të lëshojë një dokument të ri udhëtimi me të njëjtën periudhë vlefshmërie.

Neni 4

Ripranimi i shtetasve islandezë

1. Islanda do të ripranojë, me kërkesën e Republikës së Shqipërisë dhe pa formalitete të tjera, përveç atyre të përcaktuara në këtë Marrëveshje, të gjithë personat të cilët nuk plotësojnë, ose nuk i plotësojnë më tej, kushtet në fuqi për hyrjen, qëndrimin ose banimin në territorin e Republikës së Shqipërisë, me kusht që të provohet ose të pranohet në mënyrë të vlefshme në bazë të sigurimit të provave të qarta se ata janë shtetas islandezë.

2. Islanda gjithashtu do të ripranojë:

– fëmijë të mitur e të pamartuar të personave të përmendur në paragrafin 1, pavarësisht vendlindjes ose kombësisë, nëse nuk kanë lejeqëndrimi të pavarur në Republikën e Shqipërisë;

– bashkëshortët, mbajtës të një kombësie tjetër, të personave të përmendur në paragrafin 1, pa si pajisen me lejen për të hyrë e për të qëndruar, ose marrin lejen për të hyrë e për të qëndruar në territorin e Islandës, nëse nuk kanë lejeqëndrimi të pavarur në Republikën e Shqipërisë.

3. Islanda do të ripranojë persona të cilëve u është hequr ose kanë hequr dorë nga nënshtetësia islandeze që kur kanë hyrë në territorin e Republikës së Shqipërisë, nëse këtyre personave nuk i është premtuar të paktën natyralizimi nga Republika e Shqipërisë.

4. Islanda, sipas nevojës dhe pa vonesë, do ta pajisë personin, për ripranimin e të cilit është rënë dakord, me dokumente udhëtimi që i kërkohen për kthimin e tij/saj të vlefshme për një periudhë 20-ditore. Nëse, për arsye ligjore ose faktike, personi në fjalë nuk mund të transferohet brenda periudhës së vlefshmërisë së dokumentit të udhëtimit të lëshuar fillimisht, Islanda, pa vonesë, do të shtyjë vlefshmërinë e dokumentit të udhëtimit ose, nëse është nevoja, do të lëshojë një dokument të ri udhëtimi me të njëjtën periudhë vlefshmërie.

Aneksi 1

Lista e përbashkët e dokumenteve, paraqitja e të cilave konsiderohet si dëshmi e qartë për shtetësinë (nenet 2 (1), 3 (1), 4 (1) dhe 5 (1))

– Pasaporta të çdo lloji (pasaporta kombëtare, pasaporta diplomatike, pasaporta shërbimi, pasaporta kolektive dhe pasaporta zëvendësuese përfshirë pasaportat e fëmijëve )

– kartat e identitetit të çdo lloji (përfshi edhe kartat e përkohshme dhe kartat provizore);

– librezat ushtarake dhe kartat e identitetit ushtarake;

– libreza marinarësh dhe karta shërbimi të kapitenëve të anijeve;

– certifikata shtetësie dhe dokumente të tjera zyrtare që përmendin apo tregojnë shtetësinë.