KONVENTA NDËRKOMBËTARE E OKB-SË “PËR MBROJTJEN E TË GJITHË PERSONAVE NGA ZHDUKJET ME FORCË”

Neni 7

1. Çdo Shtet Palë e bën krimin e zhdukjes me forcë të ndëshkueshëm me dënimet e përshtatshme që marrin parasysh shkallën e tij ekstreme të rrezikshmërisë.

2. Çdo Shtet Palë mund të parashikojë:

a) Rrethana lehtësuese, veçanërisht në favor të atyre që, të implikuar në kryerjen e një zhdukjeje me forcë, kanë kontribuar në mënyrë të efektshme për shpëtimin e jetës së personit të zhdukur ose kanë bërë të mundur të ndriçohen raste të zhdukjes me forcë, ose të identifikohen autorët e një zhdukjeje me forcë;

b) Pa prekur procedurat e tjera penale, rrethana rënduese, veçanërisht në rast vdekjeje të personit të zhdukur ose për ata që janë bërë fajtorë për zhdukjen me forcë të grave shtatzëna, të të miturve, të personave handikapatë, ose të personave të tjerë veçanërisht të prekshëm.

Neni 25

1. Çdo Shtet Palë merr masat e nevojshme për të parandaluar dhe dënuar penalisht:

a) Marrjen e fëmijëve subjekt i një zhdukjeje me forcë ose fëmijëve, babai, nëna ose përfaqësuesi ligjor i të cilëve është bërë subjekt i një zhdukjeje me forcë, ose fëmijëve të lindur gjatë mbajtjes rob të nënës së tyre subjekt i një zhdukjeje me forcë;

b) Falsifikimin, fshehjen ose shkatërrimin e dokumenteve që vërtetojnë identitetin e vërtetë të fëmijëve të përmendur në nënparagrafin a) më sipër.

2. Çdo Shtet Palë merr masat e nevojshme për të kërkuar dhe identifikuar fëmijët e përmendur në nënparagrafin a) të paragrafit 1 të këtij neni dhe për t’ua kthyer familjeve të tyre të origjinës, në përputhje me procedurat ligjore dhe me marrëveshjet ndërkombëtare të zbatueshme.

3. Shtetet Palë i japin reciprokisht njëri-tjetrit asistencë për kërkimin dhe identifikimin e fëmijëve të përmendur në nënparagrafin a) të paragrafit 1 të këtij neni, si dhe për përcaktimin e vendit ku ata ndodhen.

4. Duke mbajtur parasysh nevojën për të ruajtur interesin më të lartë të fëmijëve të përmendur në nënparagrafin a) të paragrafit 1 të këtij neni dhe të drejtën e tyre për të ruajtur dhe për të rivendosur identitetin e tyre, duke përfshirë kombësinë, mbiemrin dhe lidhjet e tyre familjare të njohura nga ligji, në Shtetet Palë që e njohin sistemin e adoptimit ose forma të tjera të vendosjes së fëmijëve, duhet të ekzistojnë procedura ligjore që kanë për qëllim të rishikojnë procedurën e adoptimit apo vendosjes së fëmijëve dhe, kur është rasti, të anulojnë çdo adoptim apo vendosje të fëmijëve që ka si origjinë një zhdukje me forcë.

5. Në çdo rrethanë, dhe në veçanti për gjithçka që ka të bëjë me këtë nen, interesi më i lartë i fëmijës është synimi parësor dhe fëmija që është në gjendje të gjykojë ka të drejtë të shprehë lirshëm opinionin e tij, i cili merret në konsideratë rregullisht duke pasur parasysh moshën e tij dhe shkallën e tij të pjekurisë.