VENDIM Për LEJIMIN E MINISTRISË SË ARSIMIT DHE SHKENCËS TË PËRDORË PROCEDURËN “PROKURIM I DREJTPËRDREJTË”, PËR BLERJEN E PULLAVE ME HOLOGRAMË

Në mbështetje të nenit 100 të Kushtetutës, të ligjit nr.7971, datë 26.7.1995, “Për prokurimin publik”, të ndryshuar, të pikës 3, të nenit 17, të ligjit nr.9464, datë 28.12.2005, “Për buxhetin e shtetit, të vitit 2006”, me propozimin e ministrit të Arsimit dhe Shkencës, Këshilli i Ministrave

V E N D O S I:

1. Lejimin e Ministrisë së Arsimit dhe Shkencës, që, për fondin e vet, në lekë, të barazvlefshëm me shumën 38 500 (tridhjetë e tetë mijë e pesëqind) euro, të miratuar në buxhetin e vitit 2006, të kryejë procedurën “Prokurim i drejtpërdrejtë”, me shoqërinë turke “Polinas Plastik Sanayii ve Ticareti A.S. Manisa-Turkiye”, shpk, për blerjen e 5 milionë copëve pulla me hologramë, të cilat do të vendosen në tekstet shkollore, të miratuara nga Ministria e Arsimit dhe Shkencës, për të qenë të lejueshme për t’iu shitur nxënësve në shkolla.

2. Ngarkohet Ministria e Arsimit dhe Shkencës për zbatimin e këtij vendimi.

Ky vendim hyn në fuqi menjëherë.

K R Y E M I N I S T R I
SALI BERISHA
31/08/2006