VENDIM PËR NJË SHTESË FONDI NË BUXHETIN E VITIT 2008, MIRATUAR PËR MINISTRINË E BRENDSHME, PËR MBULIMIN E SHPENZIMEVE TË FAMILJARËVE, TË AKOMODUAR NË SHTËPINË E PUSHIMIT, DURRËS, PËR SHKAK TË AKSIDENTIT TEKNOLOGJIK, TË DATËS 15 MARS 2008, NË FSHATIN GËRDEC, BASHKIA VORË

Në mbështetje  të nenit 100 të Kushtetutës, të  nenit 32, të ligjit nr.8756,   datë 26.3.2001,“Për emergjencat civile”, të neneve 21 e 27, të ligjit nr.8379,      datë 29.7.1998, “Për hartimin dhe zbatimin e buxhetit të shtetit të Republikës së Shqipërisë”, të ndryshuar, dhe të nenit 11, të ligjit nr.9836, datë 26.11.2007, “Për buxhetin e shtetit, të vitit 2008”, të ndryshuar, me propozimin e ministrit të Brendshëm, Këshilli i Ministrave

V E N D O S I:

1. Ministrisë së Brendshme, në buxhetin e miratuar për vitin 2008, t’i shtohet fondi prej 20 000 000 (njëzet milionë) lekësh, për Shtëpinë e Pushimit, Durrës, për mbulimin e shpenzimeve për akomodimin (ushqim dhe fjetje) dhe shpenzime të tjera, për familjarët e sistemuar në këtë shtëpi pushimi, për shkak të aksidentit teknologjik, të ndodhur më 15.3.2008, në fshatin Gërdec, bashkia Vorë.

2. Ky fond të përballohet nga fondi rezervë i Këshillit të Ministrave.

3. Periudha e trajtimit të familjarëve të akomoduar në Shtëpinë e Pushimit, Durrës, shtëpitë e të cilëve janë bërë të pabanueshme, për shkak të këtij aksidenti, do të jetë deri në dy muaj nga data e ndodhjes së kësaj ngjarjeje.

4. Ngarkohen ministri i Financave dhe ministri i Brendshëm për zbatimin e këtij vendimi.
Ky vendim hyn në fuqi menjëherë.
K R Y E M I N I S T R I

SALI BERISHA
01/05/2008